مانرضاش يخاصم القمر السما
ما نرضاش تدوس البشر بعضها
ما نرضاش يموت جوه قلبي نداه
ما نرضاش تهاجر الجذور أرضها
ما نرضاش
قلبي جواه يغني واجراس تدق لصرخة ميلاد
تموت حته مني لأجراس بتعلن نهاية بشر من العباد
دي الحكمة قتلتني
و حيتني
وخلتني أغوص في قلب السر
قلب الكون قبل الطوفان ما ييجي
خلتني أخاف عليك يا مصر
واحكيلك على المكنون
مين اللى عاقل فينا مين مجنون
مين الي مدبوح من الألم
مين اللي ظالم فينا مين مظلوم
مين اللي ما يعرفش غير كلمة نعم
مين اللي محني لك خضار الفلاحين غلابة
مين اللي محني لك عمار عمالك الطيابة
مين اللي ببيع الضمير
مين يشتري مين يشتري بيه الدمار
مين هو صاحب المسألة والمشكلة
والحكاية والقلم
رأيت كل شيء وتعبت على الحقيقة
قابلت في الطريق عيون كتيرة بريئة
أعرف بشر عرفوني لأ
لأ ما عرفونيش
قبلوني وقبلتهم
بمد ايدي لك طب ليه ما تقبلنيش
لا يهمني اسمك لا يهمني عنوانك
لا يهمني لونك ولا ولادك مكانك يهمني الانسان
ولو ما لوش عنوان يا ناس يا ناس يا مكبوته
هي دي الحدوته حدوته مصرية
No comments:
Post a Comment